चितवन । पूर्वप्रधानमन्त्री एवं नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले विकास र समृद्धिको यात्रा राष्ट्रिय सहमतिविना सम्भव नभएको बताउनुभएको छ । माडी क्याम्पसको प्रथम ऐतिहासिक सभालाई आज सम्बोधन गर्नुहुँदै उहाँले विकासमा प्रतिपक्ष र सत्तापक्ष नभनी एकजुट भएर लाग्नुपर्ने बताउनुभयो ।
उहाँले नेपालमा अहिलेसम्मको राजनीतिक परिवर्तन राष्ट्रिय सहमतिबाटै सम्भव भएको बताउँदै भन्नुभयो, ‘विकास र समृद्धिको नयाँ यात्रा पनि राष्ट्रिय सहमतिबाटै अगाडि बढाउनुपर्छ ।’ शिक्षा क्षेत्रको विकासबाटै देशको विकास सम्भव हुने भन्दै उहाँले भन्नुभयो, ‘हाम्रा पुर्खा अशिक्षित भएर पनि बैरीसँग लडे, उनीहरुले निर्यात बढाए, हामी शिक्षित भएर पनि आयात बढाउँदैछौँ ।’ शिक्षालाई उत्पादनमुखी बनाउन आवश्यक रहेको उहाँको भनाइ थियो ।
शिक्षित युवा विदेश पलायत हुँदै गएको र यहाँ बालबालिका मात्रै रहेको भन्दै उहाँले यसले देशको विकास नहुने बताउनुभयो । शिक्षामा सार्वजनिक र निजी सहकार्यका लागि उचित सन्तुलनसहित अघि बढ्नुपर्ने अध्यक्ष दाहालले बताउनुभयो । निकुञ्जपारीको नगरपालिका माडी र भरतपुरका बीचमा दुई देशको जस्तो देखिएको बताउँदै उहाँले निकुञ्ज ऐन संशोधन गरेर माडीको विकास गर्नुपर्ने बताउनुभयो । आगामी चार वर्षमा माडीको विकासमा कायापलट हुने बताउँदै उहाँले आउने वर्षमा सबैले देख्ने गरी माडीको रङ बदलिने बताउनुभयो ।
राष्ट्रिय निकुञ्ज ऐन विसं २०२९ मा बन्दा माडीमा अहिलेजस्तो धेरै जनता नभएकाले त्यो ऐनले जनावर देख्ने तर जनता नदेख्ने उहाँको भनाइ थियो । ‘यो ऐन बदलेर यहाँ मान्छे पनि छन् भन्ने देखाउन बहस शुरु गरेको छु । बैठक गरेको छु प्रधानमन्त्रीसँग, वनमन्त्रीसँग, कर्मचारीसँग’, उहाँले भन्नुभयो, ‘राजनीतिक नेतृत्वले भनेको कुरा कर्मचारीतन्त्रले सजिलै मान्दैनन् । कर्मचारीतन्त्र कन्जरभेटिभ हुँदो रहेछ । राजनीतिक नेतृत्व सधैँ परिवर्तनका पक्षमा छ ।’
सो अवसरमा शिक्षामन्त्री गिरिराजमणि पोखरेलले नयाँ पुस्तालाई हेरेर शिक्षा दिनुपर्ने बताउनुभयो । प्राविधिक शिक्षालाई जोड दिनुपर्ने भन्दै उहाँले आगामी शैक्षिकसत्र सम्ममा सबै स्थानीय तहमा प्राविधिक शिक्षा पु¥याइने बताउनुभयो । हाल रहेका ७५३ स्थानीय निकायमध्ये ५५७ मा प्राविधिक शिक्षा पढाइ हुने गरेको उहाँले जानकारी दिनुभयो । शैक्षिक क्षेत्रको विकासबाटै देशको समृद्धि सम्भव भएको उहाँको भनाइ थियो ।
कार्यक्रममा भौतिक पूर्वाधार तथा यातायातमन्त्री रघुवीर महासेठले ‘समृद्ध नेपाल सुखी नेपाली’को चाहना पूरा गर्नेतर्फ सरकार लागेको बताउनुभयो । पहिलेको जस्तो अलपत्र योजना अब देख्न नपर्ने भन्दै उहाँले घोषणापत्रमा उल्लेख भएअनुसारका काम गरिने बताउनुभयो । निर्वाचनपछिको पहिलो वर्ष समृद्धिको खाका कोर्ने काममा आफूहरु लागेको भन्दै उहाँले अब विकासले गति लिने उहाँले बताउनुभयो । अब जनताले महसुस गर्ने गरी विकास देख्न पाउने महासेठको भनाइ थियो । उहाँले आउँदो चार वर्षमा एक हजार ८०० किलोमिटर हुलाकी सडक विस्तार गरिने बताउनुभयो ।
क्याम्पस सञ्चालक समितिका अध्यक्ष तीर्थ भुसालको अध्यक्षतामा भएको कार्यक्रममा सांसद कृष्णभक्त पोखरेल, माडी नगरपालिका प्रमुख ठाकुर ढकाल, नेपाली कांग्रेस चितवनका सचिव उत्तम जोशी, क्याम्पस प्रमुख नेत्रप्रसाद गौतम, शिवनारायण गुरौलगायतले बोल्नुभएको थियो । सभाले १५ सदस्यीय नयाँ समिति चयन गर्नेछ ।
