काठमाडौं । परिवारको पुरानो ‘धन्दा’ मै लाग्ने वा आफ्नो जीवनका अन्य आयामलाई पहिचान गर्ने भन्ने द्विविधामा रहेको प्रमुख पात्रबाट शुरु हुन्छ नाटक ‘फ्लाइट’ ।
गाउँको शक्तिशाली परिवारसँग पात्रको संघर्ष चल्छ । उसको मुक्तिको चाहना पूरा हुन पाइरहेको हुँदैन । उ बाहिर निस्कन पनि सक्दैन । गलत भएको जान्दाजान्दै पनि परिवारले चलाएको महिला भारतका कोठीमा पुर्याउने धन्दामा अभ्यस्त हुँदै जान्छ त्यो युवक पनि ।
महिलालाई सौन्दर्यभन्दा पनि आवरणलाई हेरेर उपयोगको साधन बनाएको सन्दर्भले नाटक गर्ने दर्शकलाई प्रश्न गर्न बाध्य बनाउँछ । नाटक क्रमशः अघि बढ्दै जाँदा शक्तिशाली पंक्षी चीलको प्रवेश हुन्छ । त्यसपछि जुन सन्देश नाटकमार्फत् प्रस्तुत गरिएको छ, त्यो समाजको युगान्तकारी छलाङको कसी बन्न पुग्छ ।
फ्रान्सेली कलाकार अलिजे बिआनिकको लेखन तथा निर्देशन रहेको नाटक ‘दी फ्लाइट’ काठमाडौंको कमलपोखरीमा रहेको रसियन कल्चर सेन्टरमा मञ्चन भइरहेको छ ।
नाटकमा सामाजिक विषयको उठान गरिएको निर्देशक अलिजेले बताइन् ।
‘आर्थिक प्रलोभनले सामाजिक विचलन बढिरहेको छ, तर परिवर्तन आवश्यक र अवश्यम्भावी छ भन्ने विषयको उठान नाटकमा गरिएको छ,’ उनले भनिन्, ‘दी फ्लाइटको सन्देश सोच र चिन्तनमा सम्पूर्ण परिवर्तन आवश्यक छ भन्ने नै हो ।’
सोलिस पर्फमिङ आट्र्स र वान वर्ल्ड थिएटरको प्रस्तुति रहेको नाटकमा पशुपति राई, विजया राई, किरण श्रेष्ठ, सृष्टि महर्जन, निसिला शाक्य, सरोज श्रेष्ठ, सलमान खान गुरुङ, जेडी तमु, कल्पना सियोङ सोङ, सुनिल तामाङ, रोशनी कार्की लगायत २६ कलाकारको अभिनय छ ।