बाँके । दुई दिनदेखिको अविरल वर्षाका कारण बेतहनी सडकको कजवेमा आएको बाढीले डुडुवा गाउँपालिकाको केही ठाउँ डुबानमा परेको छ । डुबानले साइकल तथा मोटरसाइकल ओहोरदोहोर गर्नसमेत अप्ठ्यारो भएको गाउँपालिकाका अध्यक्ष नरेन्द्रकुमार चौधरीले बताउनुभयो ।
बाढीले धान रोप्न तयारी अवस्थामा रहेका खेत डुबाएको छ । धानको ब्याडमा पनि क्षति पुर्याएको छ । सोमबार र मंगलबार रातभरि परेको पानीले डुडुवामा बाढी आउँदा डुडुवा गाउँपालिकाको बेतहनीमा केही घरसमेत डुबानमा परेको अध्यक्ष चौधरीले बताउनुभयो । बाढीका कारण गाउँपालिकाको वडा नम्बर ३ राजारामपूर्वाका मोलहे अहिरका तीन वटा भैंसी बगाएको छ ।
यसैबीच जिल्ला विपद् व्यवस्थापन समितिले बाँकेको राप्ती नदीमा बाढी आउन सक्ने जनाएको छ । प्रमुख जिल्ला अधिकारी मदन भुजेलले नदी तटीय क्षेत्रका नागरिकलाई सतर्क रहन आग्रह गरिएको जानकारी गराउनुभयो ।
यसैगरी नेपालगञ्ज बजारमा अविरल वर्षाका कारण नगरका होचा बस्ती डुबानमा परेका छन् । ढल तथा नालाको निकास थुनिँदा नेपालगञ्ज उपमहानगरपालिकाका विभिन्न वडा डुबानमा परेका हुन् । नालाको निकास नहुँदा स्थानीय बेलासपुर, रानी तलाउ, महेन्द्रपार्क, घरबारीटोल, बेलासपुर, न्यूरोड, गणेशपुर, बाँकेगाउँ, कोरियनपुर, भृकुटीनगर, कारकाँदो, राँझालगायत क्षेत्र जलाम्य भएका छन् ।ढलको निकास थुनिएर बस्तीमा पस्दा नेपालगञ्ज– १० स्थित जनस्वास्थ्य कार्यालय पछाडिको बस्ती डुबानमा परेको छ । थुनिएको नालाको निकास खोल्न उपमहानगरपालिकाले तदारुकता नदेखाएकोे स्थानीयवासीको गुनासो छ । एशियाली विकास बैंकको अर्बौं ऋण सहयोग खर्च गरेर नगरभरि सडक र नाला बने पनि डुबान समस्या समाधान नहुँदा नेपालगञ्जवासी आक्रोशित भएका छन् ।
नगरप्रमुख डा धवलशम्शेर राणाले अर्को वर्षदेखि डुबानको समस्या नरहने प्रतिक्रिया दिनुभएको छ । ‘नाला सफा गर्ने मेशिन किन्दैछौं’ उहाँले भन्नुभयो, ‘अर्को वर्षको वर्षात अगावै नेपालगञ्जका सबै नाला मर्मत गरेर सफाइ गरिनेछ ।’