नवलपुर । जिल्लाका दुई सहकारीले दशैंमा २ करोड ५० लाख बराबरको खसीबोका बिक्री गरेका छन् । दश दिनको अवधिमा सहकारीले स्थापना गरेको सङ्कलन केन्द्रबाट उल्लेखित मूल्य बराबरका खसीबोका बिक्री भएको हो ।
हुप्सेकोट गाउँपालिकाको झ्यालबासस्थित लेकबेसी सामाजिक उद्यमी महिला सहकारी संस्थाले दशैंमा मात्रै २ करोड ३० लाखको मूल्य बराबरको खसीबोका बिक्री गरेको छ । सहकारीले स्थापना गरेको सङ्कलन केन्द्रमा किसानबाट सङ्कलित खसीबोका बिक्री गरिएको थियो ।
बडादशैँ शुरु भएपछि नवमीसम्ममा १ हजार ७ सय ६३ वटा खसीबोका बिक्री गरेको सहकारीका व्यवस्थापक सुशीला परियारले बताउनुभयो । गाउँपालिकाको पहाडी क्षेत्रका किसानबाट सङ्कलित खसीबोका बिक्री गरिएको उहाँले बताउनुभयो । सङ्कलन भएका खसी बोका स्थानीय बजारसँगै चितवन, पोखरा र काठमाडौँका व्यापारीले खरीद गरेको व्यवस्थापक परियारले बताउनुभयो ।
उहाँका अनुसार सबैभन्दा धेरै खसीबोका चितवन निर्यात भएको छ । त्यसपछि पोखरा, काठमाडौं र स्थानीय बजारमा खपत भएको उहाँले बताउनुभयो । सहकारीले सामान्य मुनाफा राखेर ५ वर्षदेखि कृषकबाट सङ्कलित खसीबोका बिक्री गर्दै आएको छ । यसले कृषकले उत्पादन गरेका खसीबोकाले सहजरुपमा बजार प्राप्त गरेका छन् भने मूल्यमा ठगिनबाट जोगिएका छन् ।
मैनाघाटमा रहेको मैनाघाट सामाजिक उद्यमी महिला सहकारीले समेत र २० लाख बराबरको खसीबोका बिक्री गरेको छ । सहकारीले दशैं लक्षित गरेर थालेको खसीबोका बिक्रीबाट २० लाख रुपैयाँ भित्र्याएको मैनाघाट सामाजिक उद्यमी महिला सहकारीका अध्यक्ष मञ्जु खनालले बताउनुभयो ।
उहाँका अनुसार सहकारीले जिउँदो खसीको मासु प्रतिकिलोग्राम ४ सय ६० रुपैयाँ मा बिक्री गरिएकोे छ । किसानबाट ४ सय ५० मा खरिद गरी १० रुपेयाँ मात्र मुनाफा राखेर बिक्री वितरण गरिरको सहकारी अध्यक्ष खनालले बताउनुभयो ।
मध्यबिन्दु नगरपालिका–१२, तमासपुरस्थित अरुण ज्योति सामाजिक महिला उद्यमी सहकारीले पनि दशैंमा कृषकबाट खसीबोका सङ्कलन गरी बिक्री गरेका छ । सहकारीले सङ्कलन केन्द्र स्थापना गरी कृषकबाट खसीबोका सङ्कलन गरेर बिक्री गर्न थालेसँगै बाख्रापालक लाई बजारीकरणको लागि सहजता भएको छ ।
