काभ्रे । काठमाडौंको कागेश्वरी मनोहरा नगरपालिका–९ स्थित सनसिटी अपार्टमेन्टमा बस्दै आएका एक पुरुषलाई धुलिखेलस्थित उनकै घरमा प्रहरीले निगरानी गरिरहेको छ । त्षे अपार्टमेन्टमा बस्दै आएका एकै परिवारका ३ जनाको र्यापिड डायग्नोष्टिक टेष्ट (आरडिटी) मा कोरोना भाइरस देखिएका कारण अस्पताल भर्ना गरिएपछि उनी हिजै काभ्रेपलाञ्चोकको धुलिखेलस्थित घर आएका थिए ।
धुलिखेल नपा–७ सरस्वती बजारमा ती पुरुषको निगरानी गर्न हिजो साँझदेखि नै प्रहरी परिचालन गरिएको प्रमुख जिल्ला अधिकारी श्रवणकुमार तिमल्सिनाले बताउनुभयो । उहाँले भन्नुभयो, ‘सूचना पाउनासाथ हिजैदेखि प्रहरीले निगरानी गरिरहेका छन्’, उहाँले भन्नुभयो, ‘प्रहरीकै निगरानीमा कोरोना भाइरस परीक्षण गर्नेछौँ । उहाँका अनुसार उनलाई घरमा छुट्टै तरिकाले बस्न लगाइएको छ ।’
कोरोना भाइरस देखिएका आमा, छोरा र बुहारी चैत ५ गते बेलायतबाट आएको प्रहरीले जनाएको छ । कोगेश्वरी मनोहरा नगर प्रमुख कृष्णहरि थापाका अनुसार सोमबार मूलपानीस्थित नगर अस्पतालमा विदेशबाट आएका ३६ को परीक्षण गर्दा ती तीन जनाको ‘रिपोर्ट पोजेटिभ’ आएको थियो । रिपोर्ट पोजेटिभ आएका मध्ये २ जनामा कोरोना पुष्टि भएको छ । उनीहरुलाई पाटन अस्पतालमा आइसोलेसनमा राखिएको छ । त्यो अपार्टमेन्टमा सोमबार नै ‘सिल’ गरिएको छ । सनसिटीको ५ वटा भवनमा करिव ५ सय परिवारको क्षमता रहेको फ्ल्याट छन् ।
यसैबीच काभ्रेपलाञ्चोकमा आइतबारदेखि विदेशबाट फर्किएकाहरुको ¥यापिड डायग्नोष्टिक टेष्ट (आरडीटी) थालिएको छ ।अहिलेसम्म ९७ जनाको आरडिटी भएको जिल्ला स्वास्थ्य कार्यालयप्रमुख डा नरेन्द्र झाले बताउनुभयो । उहाँका अनुसार आरडिटी स्थानीय तहमै गरिएको हो ।कोभिड–१९ सङ्क्रमणको उच्च जोखिम बढ्दै गएपछि विदेशबाट काभ्रेपलाञ्चोकमा घर फर्किएर एकान्तवास (होम क्वारेन्टाइन) मा राखिएका सबैको आरडिटी गर्न थालिएको हो । कार्यालयका अनुसार माघ महिनायता ४५१ जना विदेशबाट घर फर्किएको तथ्याङ्क प्राप्त भएको छ । यसमध्ये चैत महिनामा मात्रै २ सय ५१ जना विदेशबाट घर फर्किएको सम्पर्कमा ल्याइएको हो ।
झाले घर फर्केका सबैको प्रारम्भिक स्वास्थ्य परीक्षण गरी होम क्वारेन्टाइनमै बसाइएको र यसअघि उनीहरुको स्थानीय स्वास्थ्यकर्मीले निगरानी गरिरहेको बताउनुभयो । उहाँका अनुसार हालसम्म पाँचखाल नपाका २७, बनेपा नपाका १७, पनौती नपाका १७, धुलिखेल नपाका १८ तथा महाभारत गाउँपालिकाका ५, चौँरी देउरालीका ४, बेथानचोकका ४ र रोशी गाउँपालिकाका ४ जनाको आरडिटी परीक्षण भएको र उनीहरुको ‘रिपोर्ट नेगेटिभ’ आएको छ ।
वाग्मती प्रदेशस्थित सामाजिक विकास मन्त्रालयले गएको साता आरडिटीका लागि काभ्रेपलाञ्चोकमा ३ सय किट उपलब्ध गराएको थियो । काभ्रेपलाञ्चोकमा छ नपा र सात गाउँपालिका छन् ।
