काठमाडौं । मुलुकमा शुक्रबार फेरि २ जनामा कोरोना भाइरस संक्रमण देखिएकाे छ । स्वास्थ्य तथा जनसंख्या मन्त्रालयले बाँके र रुपन्देही जिल्लामा दुई जनामा संक्रमण पुष्टि भएको जनाएको छ । याे भएसँगै नेपालमा संक्रमितको संख्या ५९ पुगेको छ ।
रुपन्देहीका २५ वर्षीय युवा राष्ट्रिय जनस्वास्थ्य प्रयोगशाला र बाँकेका ६० वर्षीय पुरुसको नेपालगञ्जस्थित भेरी अस्पतालको प्रयोगशालामा गरिएको पीसीआर परीक्षणमा कोराना भाइरसको संक्रमण पुष्टि भएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले बताउनुभयो । याेसँगै नेपालका संक्रमितको संख्या ५९ पुगेको छ । जसमध्ये ४९ पुरुष र १० जना महिला छन् । यसमध्येपनि १६ जना निको भएर घर फर्किइसकेका छन् । अस्पतालमा उपचार गराइरहेका सबैको स्वास्थ्य अवस्था समान्य रहेको प्रवक्ता देवकोटाले बताउनुभयो ।
अहिलेसम्म पीसीआर प्रविधिबाट १२ हजार ५ सय ७७ नमूना परीक्षण भएको छ । आरडिटी विधिबाट ४७ हजार ७ सय ९७ परीक्षण भएको छ । पछिल्लो २४ घण्टामा १ हजार ४ सय ६१ परीक्षण भएको छ । अहिलेसम्म प्रदेश नम्बर १ मा ५ हजार ८९, प्रदेश नम्बर २ मा ५ हजार ६ सय १७, बागमती प्रदेशमा ८ हजार ४ सय ९४, गण्डकी प्रदेशमा ५ हजार ४ सय ११, प्रदेश ५ मा ४ हजार ३५, कर्णाली प्रदेशमा ५ हजार ५ सय ६७ र सूदुरपश्चिम प्रदेशमा १३ हजार ५ सय ८४ वटा आरडिटी परीक्षण भएको प्रवक्ता देवकोटाले बताउनुभयो ।
देशभर क्वारेन्टाइनमा २४ हजार ९ सय ७ जना छन् । जसमध्ये प्रदेश नम्बर १ मा २ हजार ८ सय ७७, प्रदेश नम्बर २ मा १ हजार ३ सय ३२, बाग्मती प्रदेशमा ५ सय ३८, गण्डकी प्रदेशमा ७ सय ८, प्रदेश नम्बर ५ मा १२ हजार १ सय ६३, कर्णाली प्रदेशमा ३ हजार ७ सय २४ र सूदुरपश्चिम प्रदेशमा ३ हजार ५ सय ६५ जना क्वारेन्टाइनमा छन् । मन्त्रालयका अनुसार देशभर आइसोलेसनमा रहेका व्यक्तिको संख्या ९४ रहेको छ । ५ जना काठमाडौंमा र ८९जना उपत्यका बाहिरका अस्पताल छन् ।
