काठमाडौं । हिमाल पारिकाे जिल्ला मनाङले अन्य जिल्लाको बासिन्दालाई प्रवेशमा रोक लगाएकाे छ । मुलुकभर कोरोना भाइरस संक्रमण फैलिँदै गएपछि मनाङमा संक्रमण हुन नदिन न्य जिल्लाको बासिन्दालाई प्रवेशमा रोक लगाइएको हाे । पर्यटकीय जिल्ला मनाङ अहिलेसम्म काेराेना मुक्त छ ।
मनाङ प्रवेश नाका नासों गाउँपालिकाको बैठकले एम्बुलेन्स बाहेकका अन्य सवारीसाधन प्रवेशमा रोक लगाएको हाे । अत्यावश्यक खाद्यान्न, ग्यास लगायत सवारी र पैदलयात्रीलाई प्रवेशमा रोक लगाइएको छ । मुख्य नाकामा कडाइ गरिएमा मनाङमा फैलिन सक्ने संक्रमणको सम्भावनालाई भने योसँगै कम गर्न सकिने उनीहरुको अनुमान छ ।
देशका करिब ६० जिल्लामा कोभिड–१९ को संक्रमितपुष्टि भइसकेकाले पैदलयात्री र एम्बुलेन्सबाहेक अन्य सवारी साधनलाई प्रवेशमा रोक लगाइएको नासों गाउँपालिकाका अध्यक्ष चन्द्र घलेले बताउनुभयो । घलेका अनुसार धेरैजसो जिल्लामा कोरोना फैलिसकेकाले मनाङमा मनाङमा संक्रमण हुन नदिनका लागि यस्तो निर्णय गरिएको हो । जिल्लाको प्रवेश नाका नासों गाउँपालिका–१ तालडाँडामा जाँचचौकी बनाएर कडाइ गरिएको उहाँको भनाइ छ ।
प्रमुख जिल्ला अधिकारी, जनप्रतिनिधि र सुरक्षाकर्मीको सहयोगमा जाँचचौकी राखेर नै कडाइका साथ स्वास्थ्यकर्मी र सुरक्षाकर्मी खटाइएको उहाँले बताउनुभयो । ‘यहाँका बासिन्दालाई सुरक्षित बनाउने पहिलो जिम्मेवारी जनप्रतिनिधिको हो’ उहाँले भन्नुभयो, ‘ त्यसैले कडाइ गरे यहाँ संक्रमण फैलिन पाउँदैन भन्ने हेतुले २४ घण्टा स्वास्थ्यकर्मी र सुरक्षाकर्मी खटाएका छौँ
लकडाउनकाे बेला विभिन्न ठाउँबाट आउने गरेका तरकारी, फलफूल, मासु र पेयपदार्थ जेठ १७ गतेदेखि आयातमा रोक लगाइएको प्रमुख जिल्ला अधिकारी पुष्पराज पौडेलले बताउनुभयो । “बन्दाबन्दीको अवधिमा अत्यावश्यक खाद्यान्न, ग्यास, विकास निर्माणसम्बन्धी सामग्री, औषधि तथा एम्बुलेन्सलगायतका सवारी आवातजावात गरिएको थियो, तर देशैभर सङ्क्रमितको सङ्ख्या बढ्दै गएको छ, यहाँ पनि सङ्क्रमण फैलिन सक्ने सम्भावनालाई कम गर्ने प्रयत्न गरिरहेका छौँ, मनाङवासीको सुरक्षालाई मध्यनजर गर्दै प्रवेशमा कडाइका साथै रोक लगाएका छौँ”, प्रजिअ पौडेलले भन्नुभयो ।
औषधि तथा एम्बुलेन्सलगायत सवारी साधनले मात्रै मनाङ प्रवेश गर्न अनुमति पाउनेछन् । नाकामा कडा जाँचपछि मात्रै जिल्ला प्रवेश गराउने भएको गाउँपालिकाले जनाएको छ ।
