बाँके । राष्ट्रिय निकुञ्जले नेपालमा पहिलोपटक जंगली जनावरका लागि निर्माण गरेको पुल सञ्चालनमा ल्याइएको छ । बाँदर र न्याउरी मुसोले आफ्ना लागि बनाएको पुलको उपयोग गर्दै आएको निकुञ्जले बताएको छ ।
निकुञ्जमा जनावरले राजमार्ग वारपार गर्दा हुने दुर्घटनालाई न्यूनीकरण गर्ने उद्देश्यका साथ बाँके राष्ट्रिय निकुञ्जअन्तर्गत पर्ने राजमार्गमा पुल प्रयोगमा ल्याइएको निकुञ्जका सहायक संरक्षण अधिकृत महेश न्यौपानेले बताउनुभयो । बाँके राष्ट्रिय निकुञ्ज क्षेत्रमा पूर्व–पश्चिम राजमार्ग ७२ किलोमिटर लामो छ । त्यस्तै कोहलपुरदेखि बबईसम्मको राजमार्गको लम्बाइ ३० किलोमिटर छ ।
‘‘‘निकुञ्जमा प्रयोगात्मक रूपमा छ वटा यस्ता पुल बनाइएको छ’ उहाँले भन्नुभयो, ‘बाँदर प्रजातिका जनावरलाई लक्षित गरेर निर्माण गरिएको पुलको प्रयोग लोखर्के, बाँदर र न्याउरी मुसोलगायतका जनावरले प्रयोग गरिरहेका छन् । यसले गर्दा सवारी दुर्घटना र जीवजन्तु सवारीमा परेर मर्ने क्रम रोकिएको छ ।’ यस निकुञ्जमा राजमार्गको दूरी लामो भएको र सवारी साधनको चाप बढ्दै गएका कारण जनावरका लागि पुल निर्माण गरिएको बताइएको छ । निकुञ्ज आसपासमा क्यामरासहित पाँच स्थानमा ६ वटा पुल राखिएको निकुञ्जले जनाएको छ ।
निकुञ्जका अनुसार पाँच वर्षको अवधिमा सडक दुर्घटनामा २ सय ६४ जनावर मरिसकेका छन् । गत वर्ष दुर्घटनाको जोखिममा परेका ४ सय ३१ वन्यजन्तुको उद्धार गरिएको निकुञ्जले जनाएको छ । खाद्यान्न ढुवानी गर्ने सवारीबाट खसेका वस्तु र यात्रुले जथाभावी फ्याँकेका खानेकुरा खान जाँदा केही जनावर गाडीको ठक्करले मारिएको निकुञ्ज अधिकृत न्यौपानेले बताउनुभयो ।
पुल निर्माणपछि यस वर्ष भने सवारी दुर्घटनाबाट मारिने वन्यजन्तुको संख्यामा कमी आएको बताउँदै उहाँले भन्नुभयो, ‘‘यस वर्षमा ५ वटा स्याल, ३ वटा चित्तल, ३ वटा गिलहरी,२ वटा बाँदर, ३÷३ वटा सरीसृप र हरिण लगायतका जनावर दुर्घटनामा मारिएका थिए ।
‘निकुञ्जले यसलाई परीक्षणको रुपमा लिएको बताउँदै ‘‘छ महिनासम्म यसको अनुगमन गरिने त्यसको आधारमा थप पुल निर्माण गर्न किनेछ’, उहाँले भन्नुभयो । उहाँका अनुसार बाँदरले प्रयोग गरेको देखिएको छ ।
