म्याग्दी । जिल्लाको बेनी नगरपालिका–२ ज्यामरुककोटका तमाने र खबरा क्षेत्रमा सलहले उपद्रो मच्चाउन थालेको । एक महिनाअघि धवलागिरि हिमालको फेदीतिर देखिएको सलह यसबेला तल्लो म्याग्दीको समथरफाँटमा छपक्कै देखिएको छ । सलहले मकै तथा धानबाली नष्ट गरेर किसानलाई हैरान बनाइरहेको बताइएको छ ।
पश्चिम म्याग्दीको मालिका, मङ्गला र बेनी नगरपालिकाको ज्यामरुककोट, भकिम्ली, बगरफाँट, रत्नेचौर, पुलाचौरलगायतका गाउँमा लगाएको मकै र धानबाली सलहको झुण्डले नष्ट गरिदिएपछि किसान रुनु न हाँस्नुको अवस्थामा पुगेको बेनी नगरपालिका–२ खबराकी किसान तुलसी सापकोटाले बताउनुभयो । सलहले मकै, धान र कोदो, सुन्तला, केरा र वनका रुखको पात खाएर नष्ट गरेको गौश्वाराका किसान ध्रुव घिमिरेले भन्नुभयो ।
बालीमा पसेको सलहलाई धपाउनका लागि स्थानीयबासीले टिन, थाल ठट्टाएर भगाउने प्रयास गरे पनि सफल नभएको उहाँले जानकारी दिनुभयो । बिहीबार बिहानै खेतबारीमा देखिएको सलह आइतबार बिहानसम्म पनि खेतबारीमा नै रहेको छ । सहलले सबैभन्दा बढी मकैबालीमा क्षति पुर्याएको छ । सलहले तरकारी र लहरेबालीमा समेत क्षति पुर्याएको स्थानीयबासीले बताएका छन् ।
पश्चिम म्याग्दीमा सबैभन्दा धेरै सलह देखिएको छ । बाढीपहिरोले बितण्डा मच्चाइरहेको अवस्थामा खेतबारीमा सलह देखिएपछि स्थानीय चिन्तित बनेका छन् । कृषि ज्ञान केन्द्रले सलह प्रवेश गरे पनि क्षतिको विवरण प्राप्त भइनसकेको जनाएको छ । दुई हप्ताअघि म्याग्दीको लुलाङ, मुना, बगर, मुदी, सिस्नेरी, घार, सिङ्गा, भकुण्डेलगायतका क्षेत्रमा सलह पानी परेपछि हराएको थियो । पहिरो र कोरोनाको कहरका बीचमा भित्रिएको सलहले बाली नष्ट गरेपछि किसान निराश भएका छन् ।
