तनहुँ । व्यास नगरपालिकाले तीन महिनाको अवधिमा चार करोडभन्दा बढी आन्तरिक आम्दानी गरेको छ । चालु आर्थिक वर्षको असोज मसान्तसम्म नगरपालिकातर्फ तीन करोड १६ लाख ८६ हजार र जग्गा रजिष्ट्रेशन दस्तुरबापत ८५ लाख आन्तरिक आम्दानी भएको हो ।नगरपालिकाले गत आर्थिक वर्षमा लक्ष्यभन्दा कम राजश्व संकलन गरेको थियो । कोभिड–१९ को प्रभावका कारण गत आर्थिक वर्षमा लक्ष्यभन्दा ६ करोड कम राजश्व संकलन भएको थियो । गत आर्थिक वर्षमा १६ करोड ६ लाख ९६ हजार राजश्व संलनको लक्ष्य थियो ।नगरपालिकाले चालु आर्थिक वर्षका लागि १६ करोडको आन्तरिक आम्दानीको लक्ष्य लिएको थियो । आन्तरिक राजश्वतर्फ सम्पत्ति, मालपोत, घरबहाल, विज्ञान, व्यवसाय, मनोरञ्जन, प्राकृतिक स्रोतसाधन उपयोग करलगायतबाट ९ करोड २६ लाख ८८ हजार, शुल्कतर्फ सेवा, सवारी पार्किङ, सरसफाई, शौचालय, बस्ती विकास, सम्पत्ति मूल्याङ्कन, अन्य प्रमाणित, स्थानीय वातावरण शुल्कबाट रु एक करोड ७८ लाख ७२ हजार, दस्तुरतर्फ दर्ता र नवीकरण, घरनक्सा, सिफारिस, नाता प्रमाणित, मिलापत्रबाट रु दुई करोड ६४ लाख ६० हजार, दण्ड जरीवानाबाट रु दुई लाख, घरभाडा, मेशनरी उपकरण भाडा, लिलाम बिक्री, परीक्षा, विविध फारम तथा अन्यबाट रु दुई करोड २७ लाख ८० हजार आम्दानी गर्ने लक्ष्य लिएको छ ।
प्रकाशित मिति: शनिबार, कात्तिक ८, २०७७ १६:२८
