सिन्धुली । पछिल्लो समय सिन्धुलीको दुम्जा पर्यटकीय क्षेत्रका रूपमा विकास हुँदै गएको छ । दुम्जाको धरिनडाँडालाई पर्यटकीय स्थलका रूपमा विकास गर्न थालीएको हो ।मकवानपुरका सेन राजाबाट काजी दामोदर कोइरालाले दुम्जा क्षेत्र खान्की बिर्ताका रूपमा पाएका थिए । तिनै दुम्जाली कोइराला परिवारका चार सन्तान नेपालको प्रधानमन्त्री समेत बन्नुभयो । तीमध्ये तीन प्रधानमन्त्रीका पिता हुनुहुन्थ्यो, पिताजी कृष्णप्रसाद कोइराला । जो दुम्जाको धरिनडाँडामा जन्मिनुभएको थियो । इतिहासको यो गहकिलो र गर्विलो कथा पछ्याउँदै दुम्जाको धरिनडाँडालाई बीपी पार्कका रूपमा विकास गर्ने कार्य अगाडि बढिरहेको छ । लामो समयदेखि स्थानीयस्तरमा आवाज उठे पनि प्रयासले सार्थकता पाउन सकेको थिएन ।
![](https://sgp1.digitaloceanspaces.com/janata/janatasamachar/uploads/2021/07/dumja2-1-360x360.jpg)
सिन्धुली जिल्लाको सुनकोसी गाउँपालिका–१, दुम्जास्थित धरिनडाँडाको ७६ रोपनी जग्गा अधिग्रहण र करिब १७८ रोपनी सार्वजनिक जग्गासहित गुरुयोजना बनाई बीपी पार्कको कार्यलाई अगाडि बढाइएको सघन सहरी तथा भवन निर्माण आयोजना रामेछापले जनाएको छ । आयोजना प्रमुख नारायण भण्डारीका अनुसार करिब ५० करोड रुपियाँको लागत रहेको गुरुयोजनाबमोजिम बहुवर्षीय योजनाअनुसार पार्कको निर्माण कार्यलाई अगाडि बढाइएको छ । जसअनुसार यस वर्ष पार्कसम्म पुग्ने सडक कालोपत्रे गरिएको छ । यस आर्थिक वर्षका लागि सरकारले दुई करोड ४० लाख रुपियाँ विनियोजन गरेको छ ।नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ दोस्रोपटक प्रधानमन्त्री भएका बेला २०७४ सालतिर दुम्जाका लागि पहिलोपटक बजेट विनियोजन भएको थियो । सिन्धुली क्षेत्र नम्बर २ का सांसद हरिबोल गजुरेलले समेत सो क्षेत्रलाई पर्यटकीय क्षेत्रका रूपमा विकास गर्न पहल लिनुभएको थियो । त्यसपछि सङ्घीय सरकारबाट नियमित रूपमा बजेट विनियोजन भई काम अगाडि बढिरहेको कुशेश्वर विद्यापीठ पूर्वविद्यार्थी समाजका अध्यक्ष प्रा.डा. विद्यानाथ कोइरालाले जानकारी दिनुभयो । सो क्षेत्रलाई पर्यटकीय स्थलका रूपमा विकास गर्न कुशेश्वर विद्यापीठ पूर्वविद्यार्थी समाजको पहलमा प्रयास अगाडि बढाएको थियो ।समाजका अध्यक्ष कोइरालाका अनुसार बीपी पार्कमा पिताजी कृष्णप्रसाद कोइरालाको परम्परागत शैलीको घर, बीपी सङ्ग्रहालय, पुराना पोखरीको संरक्षण, सभागृह, स्थानीय कला संस्कृति झल्कने सङ्ग्रहालय, वनभोजस्थललगायत रहनेछन् ।
![](https://sgp1.digitaloceanspaces.com/janata/janatasamachar/uploads/2021/07/dumja-1-360x195.jpg)
त्यस्तै पार्कस्थलमा पिताजी कृष्णप्रसाद कोइराला, मातृकाप्रसाद कोइराला, विश्वेश्वरप्रसाद कोइराला, गिरिजाप्रसाद कोइराला, सुशील कोइराला, धरणीधर कोइराला, दीर्घराज कोइरालालगायत शिक्षा, साहित्यका क्षेत्रबाट मुलुकका लागि महत्वपूर्ण योगदान गर्ने दुम्जाली स्रष्टाको समेत सालिक स्थापना गरिने जनाइएको छ । बीपी राजमार्गबाट करिब पाँच किलोमिटर दूरीमा रहेको सो क्षेत्रमा पुग्न नेपालथोक, आँपघारी र गजुलीदहबाट पदमार्गसमेत निर्माण गरिने छ ।पूर्वमन्त्री विपिन कोइरालाले दुम्जामा बीपी पार्कको निर्माणले नेपालको राजनीतिक एवं सामाजिक आन्दोलनलाई नागरिक स्तरमा स्थापित गर्न महत्त्वपूर्ण भूमिका निर्वाह गर्ने र स्थानीय नागरिकको आर्थिक विकासमा समेट टेवा पु–याउने बताउनुभयो ।रामेछापमा पुष्पलाल पार्क र सिन्धुलीको दुम्जामा बीपी पार्कलाई पर्यटकीय क्षेत्रका रूपमा विकास गरी नेपालको लोकतान्त्रिक तथा वाम आन्दोलनका दुई शीर्ष पुरुषको सम्मान गरिएको सांसद हरिबोल गजुरेलले बताउनुभयो ।