काठमाडौं । नेकपा एमाले अध्यक्ष केपी शर्मा ओलीले आफ्नै तजबिजबाट नेतृत्व छान्ने तयारी गर्नुभएको छ ।
उहाँले १८ जना पदाधिकारीको सूची तयार पारेका छन् । उक्त सूची शनिबार राति तयार पारिएको हो । जसमा वरिष्ठ उपाध्यक्षमा ईश्वर पोखरेल, उपाध्यक्षहरूका अष्टलक्ष्मी शाक्य, सुवास नेम्वाङ, रामबहादुर थापा, सुरेन्द्र पाण्डे, विष्णु पौडेल र भीम रावललाई समावेश गरिएको थियो।
त्यसैगरी महासचिवमा शंकर पोखरेलको प्रस्ताव आएपछि पौडेलले आपत्ति जनाउनुभएको थियो । स्रोतका अनुसार पौडेल शंकरलाई महासचिव मान्न तयार नभएपछि ओली खेमामै समस्या खडा भएको छ।
त्यस्तै नेम्वाङ पनि ईश्वरलाई वरिष्ठ उपाध्यक्ष मान्न तयार हुनुहुन्न । उहाँले सबै पदमा सहमति हुने भए आफू बाधक नबन्ने बताउनुभएको थियो । उपमहासचिवमा पृथ्वी सुब्बा गुरुङ, प्रदीप ज्ञवाली र टोपबहादुर रायमाझीलाई राखिएको थियो।
त्यस्तै, सचिवमा योगेश भट्टराई, गोकर्ण विष्ट, रघुवीर महासेठ, लेखराज भट्ट, रघुजी पन्त, विष्णु रिमाल, भानुभक्त ढकाललाई राखिएको थियो। यसमा खगराज अधिकारी, किरण गुरुङ, पद्मा अर्याललगायत नेताहरूले असहमति जनाएका छन्। उनीहरूले यसमा चुनाव हुनुपर्ने भन्दै ओलीलाई दबाब दिए पनि बाहिर भने केही बोलेका छैनन्।
पदाधिकारीमा युवराज ज्ञवाली, भुसाल, भीम आचार्यलाई समेटिएको थिएन। ओली पक्षका एक नेताका अनुसार सुरेन्द्र पाण्डेलाई संगठन विभागको जिम्मेवारी दिने आश्वासन दिइएको थियो भने अन्य नेताहरूको हकमा केही भनिएको थिएन।
बन्दसत्रले शनिवार भावी केन्द्रीय कमिटीको चयन गर्ने सर्वाधिकार अध्यक्ष केपी शर्मा ओलीलाई दिएको थियो ।
बन्दसत्रले विधान संशोधन प्रस्ताव पारित गरेपछि महाधिवेशनको मुख्य काम भावी केन्द्रीय कार्यसमितिको चयन गर्ने विषयमा प्रवेश गरेको थियो। संगठन विभाग प्रमुख विष्णु पौडेलले सहमतिमार्फत नेतृत्व गर्ने र सहमतिको नाम प्रस्ताव गर्ने अधिकार केपी शर्मा ओलीलाई दिने प्रस्ताव गर्नुभएको थियो ।
पौडेलको प्रस्तावलाई महाधिवेशन प्रतिनिधिहरुले सर्मथन जनाएका थिए ।
