बुटवल । राष्ट्रपति विद्यादेवी भण्डारी विहीवार लुम्बिनी आउनुहुने भएको छ ।
लुम्बिनीमा आयोजित त्रियान सम्मेलनमा सहभागी हुन उहाँ आउन लाग्नुभएको हो । लुम्बिनी बौद्ध विश्वविद्यालयको आयोजनामा बुद्ध जन्मस्थल लुम्बिनीमा प्रथम त्रियान प्रज्ञा सम्मेलन बुधबारबाट सुरु भएको हो ।
सम्मेलनको मुख्य समारोहको उदघाटन गर्न राष्ट्रपति भण्डारी लुम्बिनी आउन लाग्नुभएको हो । विश्वविद्यालयले बौद्ध संस्कृति र समृद्धि तथा बौद्ध शिक्षण पद्धतिमा केन्द्रित रहेर त्रियान सम्मेलन आयोजना गरेको हो ।
राष्ट्रपतिले दिउँसो १ बजे सम्मेलनको उदघाटन गर्ने विश्वविद्यालयका रजिष्ट्रार डा तिलकराम आचार्यले जानकारी दिनुभयो । उहाँले विश्वविद्यालयमा निर्माण गरिएको केन्द्रीय पुस्तकालय भवनको पनि उदघाटन गर्ने कार्यक्रम छ । त्रियान सम्मेलन उदघाटनअघि राष्ट्रपति भण्डारीले कपिलवस्तुको बाणगंगास्थित कैलाश आश्रमको निरीक्षण गर्ने कार्यक्रम समेत छ ।
लुम्बिनीमा आयोजित त्रियान सम्मेलनमा नेपालका बौद्ध विद्धान तथा अनुसन्धानकर्ताहरुको सहभागी छन् । सम्मेलनको पहिलो दिन बौद्ध संस्कृति र समृद्धिका विषयमा कार्यपत्र प्रस्तुत भएका छन् ।
थेरबाद बौद्ध संस्कृति र समृद्धि विषयमा अनागारिका प्रितिवती र मदनरत्न बज मानन्धरले कार्यपत्र प्रस्तुत गर्नुभएको थियो । कार्यपत्रमा थेरवादी संस्कृतिलाई मुलुकको समृद्धिसँग जोड्न सकिने भन्दै थेरवादी परसम्पराको प्रवद्र्धनमा जोड दिनुपर्ने उल्लेख गरिएको छ । विश्वविद्यालयका पूर्व उपकुलपति प्रा।डा त्रिरत्न मानन्धरको अध्यक्षतामा भएको सम्मेलनमा प्रस्तुत भएका कार्यपत्रमाथि भिक्षु वजिर र डा रिना तुलाधरले टिप्पणी गर्नुभएको छ ।
त्यस्तै थेरबाद बौद्ध शिक्षण पद्धति विषयमाथि प्रा डा भिक्षु सांकिच्च महास्थविरले कार्यपत्र प्रस्तुत गर्नुभएको थियो । त्यस कार्यपत्रमाथि इश्वरचन्द्र विद्यासागर श्रेष्ठले टिप्पणी गर्नुभएको थियो । त्यस्तै महायान बौद्ध संस्कृति र समृद्धि विषयमा आचार्य सार्की शेर्पाले कार्यपत्र प्रस्तुत गर्नुभएको थियो भने डा शारदा पौडेलले टिप्पणी गर्नुभएको थियो । सोही विषयमा प्रा डा रमेश ढुंगेल, लोपेन कर्मा यान्चेनले पनि कार्यपत्र प्रस्तुत गर्नुभएको थियो ।
त्यस्तै महायान बौद्ध शिक्षण पद्धति विषयमा डा तेन्जिङ जिन्पा भूतियाले कार्यपत्र प्रस्तुत गरेका थिए । त्यस्तै बज्रयान संस्कृति र समृद्धि विषयमा बिहीबार गोष्ठी हुँदैछ । विश्वविद्यालयका उपकुलपति हृदयरत्न बज्राचार्यले विश्वविद्यालयले बौद्ध संस्कृतिलाई समृद्धिसँग जोड्ने योजनासहित यो सम्मेलनको आयोजना गरिएको बताउनुभयो ।
