बाजुरा । जिल्लाका बडीमालिका बूढीनन्दा, दहडाँडा, बडालेखलगायतका उच्च हिमाली क्षेत्र यति बेला पुस महिनाको मध्यतिर सेताम्मे बनेका छन् । जिल्लाका हिमाली गाउँपालिका, बडिमालिका नगरपालिका, गौमूल गाउँपालिका, त्रिवेणी नगरपालिकाका केही स्थानमा हिउँ पर्न थालेपछि गाईबस्तुलाई पानी खुवाउनसमेत समस्या भएको छ ।
जिल्लाका हिमाली गाउँपालिकाको गुम्बा, बडिमालिका नगरपालिकाको ढम्कने, बूढीनन्दा नगरपालिकाको पाण्डुसैनलगायतका क्षेत्रका किसानलाई भने समस्या भएकोे छ । तीनदेखिको मौसम बदलीसँगै पानी पर्न थालेपछि यहाँका शैक्षिक संस्था बन्द भएका छन् ।
लगातारको मौसम बदलीले गर्दा पानी पर्न थालेका कारण चिसो बढ्दै गएकाले शैक्षिक संस्था बन्द भएका हुन् । यहाँका कतिपय शैक्षिक संस्थाले सञ्चालन गरेका परीक्षासमेत प्रभावित बनेका छन् । गए रातिदेखि हिमपात सुरु भएपछि विद्यालयमा बालबालिका आउन सक्ने अवस्था नभएकाले विद्यालय बन्द गर्नुपरेको मालिका नमूना माध्यमिक विद्यालयका प्रधानाध्यापक शुभराज उपाध्यायले बताउनुभएको छ ।
जाडोका कारण बालबालिका बिरामी हुनसक्ने भएकाले हिमपात नरोकिएसम्म विद्यालय बन्द हुने प्रधानाध्यापक उपाध्यायले बताउनुभयो ।
जिल्लामा हिमपात सुरु भएपछि लेकाली भेगमा रहेका जङ्गली जनावरको चोरी शिकारी बढ्ने भएको छ । हिमपातका कारण जङ्गली जनावर न्यायो खोज्दै बेसीमा आउने गरेकाले स्थानीयले भाला छुरालगायतका साधनले मारेर सिकार गर्न गरेका छन् । लेकाली भेगमा रहेका हरिण, मृत, रतुवा, कालिज घोरललगायतका जङ्गली जनावरको सहजैरुपमा उनीहरुले चोरी शिकारी गर्ने गरेका छन् ।
हिमपात भएपछि स्थानीयले समूह बनाउँदै उनीहरुलाई पासोमा वा अन्य हतियार प्रयोग गर्दै सिकार गर्ने गरेका छन् । यहाँका हिमाली गाउँपालिका, स्वामीकार्तिक, जगन्नाथ, गौमूल, बडीमालिका, त्रिवेणीलगायतका पालिकामा स्थानीयले जङ्गली जनावरको चोरी सिकार गर्ने गरेका हुन् ।
जङ्गली जनावरको छाला निकालेर बिक्री पनि गर्ने गरेको पाइन्छ । सरकारले वन्यजन्तु सिकार गर्न नपाइने गरी कानुन बनाएको भएपछि हिमाली तथा पहाडी जिल्लाका स्थानीयले लुकीछिपी जङ्गली जनारको सिकार गर्न छोडेका छैनन् । हिमपात भएपछि घरै जङ्गली जनावर वास खोज्दै आउने गरेकाले सिकार गर्न झन् सहज हुने गरेको छ । जङ्गली जनावरको चोरी शिकारी रोक्नका लागि डिभिजन वन र प्रहरीको सुरक्षामा निगरानी आवश्यक रहेको छ ।
