पाल्पा । पाल्पाको रानीमहलमा यही चैत २४ देखि २६ गतेसम्म राष्ट्रिय महिला ‘बिच’ भलिबल प्रतियोगिता आयोजना हुँदैछ । पाल्पा स्थायी घर भइ समाजका विभिन्न क्षेत्रमा प्रतिनिधित्व गर्ने व्यक्तिको समन्वय, सहयोग र अग्रसरतामा उक्त प्रतियोगिता आयोजना हुन लागेको हो ।
सञ्जय स्मृति मेमोरियल फाउन्डेसन आयोजक रहेको उक्त प्रतियोगितामा सात प्रदेशबाट एक–एक, तीन विभागीय र स्थानीयसहित दुई आमन्त्रित टोलीबीच प्रतिस्पर्धा हुनेछ ।
‘विच’ भलिबल प्रतियोगिताको सद्भावनादूतमा राष्ट्रिय महिला भलिबल टोलीकी कप्तान अरुणा शाही र कलाकार धीरेन शाक्यलाई मनोनीत गरिएको छ । दुवै जना पाल्पा निवासी हुनुहुन्छ । प्रतियोगिता आयोजनासँगै रानीमहललाई मुलुककै विच भलिबलको ‘हव’का रुपमा विकास र विस्तार गर्ने सोच अघि सारिएको छ ।
‘विच’ भलिबल समुद्र, नदी तथा खोला किनारमा बालुवामा खेलिने खेल हो । नेपालमा रहेका ६ हजारभन्दा बढी नदी र खोला किनारलाई विच भलिबलको पूर्वाधार अर्थात् मैदानकारुपमा प्रयोग गर्ने सकिन्छ । युवा तथा खेलकुद मन्त्रालयका सचिव डा दामोदर रेग्मीले पाल्पाको रानीमहललाई बिच भलिबलको ‘हब’ बनाउन सकिने बताउनुभयो ।
प्रतियोगिता आयोजक समितिका पदाधिकारीसँगको छलफलमा उहाँले भन्नुभयो, “नेपालका अधिकांश नदी र खोला किनारामा यस खेलको प्रशस्त सम्भावना छ ।” पाल्पाली उत्साहित अभियन्ताले सुन्दर मनोरम रानीमहलको पर्यटकीय प्रवद्र्धनसँगै बिच भलिबलको ‘हव’ कारुपमा विकास गर्नुपर्छ भन्ने कुरा उठाउँदै आएका बिच भलिबल सङ्घका अध्यक्ष यकेन्द्र कुँवरले बताउनुभयो ।
प्रतियोगितामा पुरस्कारलगायत व्यस्थापनका लागि ३० लाख खर्च लाग्ने अनुमान गरिको छ । मुलुकमा विच भलिबलको विकास र विस्तार गर्ने सिलसिलामा खेलाडीलाई विगतमा वैदेशिक प्रशिक्षणमा पठाइएको र दक्षिण एशियाली खेलकुद प्रतियोगिता (साग) मा नेपालले कास्य पदकसमेत जितेको इतिहास छ । यसअघि सन् २०११ मा चितवनमा राष्ट्रिय विच भलिबल प्रतियोगिता आयोजना गरिएको थियो ।
नेपालमा ठूला तारे होटललगायतका क्षेत्रमा विच भलिबल खेल्ने गरेको पाइन्छ । विसं २०७६ मङ्सिर १५ देखि २४ गतेसम्म नेपालमा १३औँ दक्षिण एशियाली खेलकुद प्रतियोगिता (साग) आयोजना गरिएको थियो ।
विच भलिबल कास्कीको पोखरामा सम्पन्न भएको थियो । उक्त प्रतियोगितामा नेपालले पुरुष र महिला दुवै विधामा भाग लिएको थियो । पुरुषतर्फ नेपालसहित श्रीलङ्का, पाकिस्तान, बङ्गलादेश र माल्दिभस तथा महिलातर्फ नेपालसहित श्रीलङ्का र माल्दिभस सहभागी थिए ।
नेपालले महिलातर्फ कास्य पदक प्राप्त गरेको थियो । उक्त पदक विनिता बुढाथोकी र नेविका चौधरीको जोडीले प्राप्त गरेको थियो । पुरुष टोली भने लिग चरणबाटै बाहिरिएको थियो ।
आयोजक संस्थाकी अध्यक्ष एवं नेपाल भलिबल सङ्घकी उपाध्यक्ष निरोज मास्केले बिच भलिबलमा न्यून खर्चमा मुलुकले चाँडो अन्तर्राष्ट्रिय पदक प्राप्त गर्नसक्ने सम्भावना रहेको बताउनुभयो । प्रतियोगिताका लागि रानीमहलमा अन्तर्राष्ट्रिय मापदण्डको खेल मैदान र निर्णायक मण्डल रहने उहाँले जानकारी दिनुभयो ।
नायक धिरेन शाक्यले खेलको माध्यमबाट पर्यटकीय क्षेत्रका रुपमा रानीमहल र पाल्पालाई परिचित गराउने उद्देश्यले विच भलिबल आयोजना गर्न लागिएको धारणा राख्नुभयो । उक्त प्रतियोगिताका लागि युवा तथा खेलकुद मन्त्रालयले सहयोग र प्रोत्साहन गर्ने बताइएको छ । पर्वतीय खेलकुद महासङ्घका अध्यक्ष गोबिन्द भट्टराईले विच भलिबल र र्याफिटङको नेपालमा प्रवल सम्भावना रहेको बताउनुभयो ।
पाल्पाली सङ्गमका अध्यक्ष तथा प्रतियोगिता आयोजक समितिका सदस्य पदम न्यौपानेले बिच भलिबल प्रतियोगिताले पाल्पा र त्यस वरपरको क्षेत्रको लोकप्रियता बढाउने अपेक्षा गरिएको उल्लेख गर्नुभयो ।
