काठमाडौँ । नेपालमा पुनर्जलीय झोल (जीवनजल) उत्पादन बन्द भएको छ ।
उत्पादन लागतमै नोक्सान भएको भन्दै अधिकांश निजी उद्योगीले उत्पादन गर्न बन्द गरेका हुन् । सरकारले हाल तोकेको मूल्यमा जीवनजल उत्पादन गर्न नसकिने उद्योगीले जनाएका छन् ।
नेपालमा आठवटा उद्योगले जीवनजल उत्पादन गर्दै आएकोमा हाल एक÷दुईवटा उद्योगले मात्रै उत्पादन गरिरहेको छ । उनीहरुले पनि उद्योगसँग कच्चा पदार्थ मौज्दात रहुञ्जेल मात्रै उत्पादन गर्न सकिने बताएका छन् । अब खरिद गरेको कच्चा पदार्थबाट प्रतिप्याकेट १० रुपियाँमा जीवनजल उत्पादन गर्न सकिने अवस्था नरहेको उद्योगीहरू बताउँछन् ।
नेपाल औषधि उत्पादन सङ्घका उपाध्यक्ष सन्तोष बरालले भारत, बङ्गलादेश र चीनबाट महँगोमा कच्चा पदार्थ खरिद गरेर नेपालमा जीवनजल उत्पादन गर्न नसकेपछि उत्पादन नै बन्द गर्नुपर्ने अवस्था आएको बताउनुभयो । सरकारले जीवनजलको उपभोक्ता मूल्य प्रतिप्याकेट १० रुपियाँ तोकेको छ । तर, एक प्याकेट जीवनजल उत्पादन गर्नका लागि १५ देखि १७ रुपियाँ लागत पर्ने उहाँले बताउनुभयो । उहाँले सात रुपियाँ नोक्सानमा जीवनजल उत्पादन गरेर बिक्री गर्न सक्ने अवस्था नरहेका कारण उत्पादन बन्द गर्नु परेको बताउनुभयो । आदि रेमेडिज प्रालिका सञ्चालकसमेत रहनुभएका बराल स्वयंले गएको माघ महिनादेखि जीवनजल उत्पादन गर्न छोडेको जानकारी दिनुभयो ।
हाल भारतमा जीवनजलको मूल्य प्रतिप्याकेट ३२ रुपियाँ रहेको उहाँले बताउनुभयो ।
२०६४ सालमा औषधि व्यवस्था विभाग, नेपाल औषधि उत्पादक सङ्घ र नेपाल औषधि व्यवसायी सङ्घको सहमतिमा जीवनजलको मूल्य प्रतिप्याकेट १० रुपियाँ तोकिएको थियो । त्यसयता १४ वर्षदेखि यसको मूल्य बढेको छैन ।१४ वर्षअघि जीवनजलको मूल्य त्यस समयको बजारलाई हेरेर १० रुपियाँ तोकिएको थियो, त्यसबेला प्रतिडलरको भाउ ५५ देखि ५७ रुपियाँ थियो, अहिले प्रतिडलर १२१ रुपियाँ पुगेको छ । कच्चा पर्दाथको मूल्य पनि दोब्बर भएको औषधि उद्योगीहरूले बताए । हाल दुर्गम गाउँमा झाडापखाला महामारीका रूपमा फैलियो भने जीवनजल लगभग नपाइने अवस्था रहेको उद्योगीहरु नै बताउछन् । तर औषधि व्यवसायीहरूले अब यसमा चाहेर पनि केही गर्न नसकिने भन्दै आएका छन् ।
यता औषधि व्यवस्था विभागले महानिर्देशक भरत भट्टराईले जीवनजल अभाव हुने अवस्था आउन नदिने बताउनुुभयो ।अहिले तत्कालै जीवनजलको अभाव हुने अवस्था नरहेको भन्दै उहाँले आवश्यक जीवनजल विशेष निर्देशन दिएर भए पनि उपलब्ध गराउने दाबी गर्नुभयो । महानिर्देशक भट्टराईले औषधि उत्पादन उद्योगी र औषधि व्यवसायीले उठाएका मागप्रति विभाग संवेदनशील भएर यथाशीघ्र समाधान गर्ने गरी आन्तरिक तयारीमा जुटेको जानकारी दिनुभयो ।
उहाँले मूल्य समायोजनको विषयमा विभाग एक्कैले चाहेर नहुने हुँदा सकेसम्म चैत महिनाभित्रै उद्योगी र व्यवसायीले उठाएका मागको समाधान गर्नका लागि पहल गर्ने जानकारी दिनुभयो ।
