अश्मिता तिवारी
काठमाडाैं । समाज सेवाको उद्देश्य लिएर सेन्ट जेभियर्स कलेजका विद्यार्थीहरुले मनोरञ्जनात्मक कार्यक्रम आयोजना गरेका छन् ।बिहीवार सेन्ट जेभियर्स कलेजमा बी एससी सीएस आइटी चौथो सेमेस्टरमा अध्यनरत विद्यार्थीले कलेज परिसर भित्रै मनोरञ्जनात्मक कार्यक्रम सम्पन्न गरेका हुन् ।
मनोरञ्जनात्मक कार्यक्रम भन्ने बित्तिकै आफ्नो व्यवसायको प्रवर्द्धनका लागि गरिने कार्यक्रम भन्ने बुझिन्छ, तर सेन्ट जेभियर्स कलेजमा अध्यनरत विद्यार्थीले भने समाज सेवाको भावना लिएर मनोरञ्जनात्मक कार्यक्रम गरेका छन्।
समाज सेवाको उद्देश्यले आयोजना गरिएको कार्यक्रममा कलेजमा विद्यार्थी मात्र नभएर अन्य सबै समावेश हुन सकिने व्यवस्था थियो । तर च्यारिटी इभेन्टमा आधारित भएकाले कार्यक्रममा प्रवेश गर्न प्रवेश शुल्क दिनुपर्ने र खाजा पनि शूल्क तिरेरै खानु पर्ने व्यवस्था गरिएको थियो ।
कार्यक्रमबाट उठेको शुल्क समाज सेवामा लगाउने विद्यार्थीको भनाइ छ । निजी कलेजमा अध्ययन गरिरहेका विद्यार्थीले सरकारी विद्यालयलाई सहयोग गर्ने उद्देश्यले कार्यक्रम आयोजना गरिएको आयोजक विद्यार्थीले जनाएका छन्।
राजधानीका निजी कलेज तथा विद्यालयहरु सेवा सुविधा सम्पन्न छन् तर ग्रामिण क्षेत्रमा भएका विद्यालयहरुमा पर्याप्त सुविधा नभएकाले उक्त च्यारिटीबाट प्राप्त हुने नगदबाट सरकारी विद्यालयलाई नयाँ प्रविधिको कम्युटर प्रदान गर्ने उनीहरुले बताएका छन्। कार्यक्रमबाट संकलन भएको रकमबाट सुदूरपश्चिममा रहेका सरकारी विद्यालयहरुलाई सहयोग गर्ने उनीहरुको भनाइ छ।
समाज सेवाको उद्देश्यले आयोजना गरिएको कार्यक्रममा राजेश नेपाली, प्रवेशकुमार श्रेष्ठ, अशेष थापा लगायतका कलाकारले प्रस्तुति दिएका छन् । इसिका पन्तको संयोजनमा आयोजित कार्यक्रममा कलेजमा विद्यार्थीका अतिरिक्त अन्य विद्यालयका विद्यार्थी दर्शकहरुको सहभागीता रहेको थियो ।
