काठमाडौं । सात दलीय सत्ता गठबन्धनमा आबद्ध दलहरूले मन्त्रिपरिषदमा पठाउने सम्भावित सांसदहरूको सूची तयार पार्न थालेका छन् । सोमबार ७ मन्त्रीसहित शपथ लिएका नव नियुक्त प्रधानमन्त्री तथा नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल, नेकपा (एमाले) अध्यक्ष केपी शर्मा ओली, राष्ट्रिय स्वतन्त्र पार्टीका रवि लामिछानेलगायत नेताहरूले पार्टीबाट क–कसलाई मन्त्री बनाउने भन्ने गृहकार्य थालेका हुन् ।
सत्ता गठबन्धनमा आबद्ध दलहरूबीच सोमबार भएको भागबण्डाबारे सामान्य छलफलमा नेताहरूले मन्त्रालय दाबी गर्दा एमालेले १० देखि ११, माओवादी केन्द्रले ५ देखि ७, रास्वपाले ५, राप्रपाले ३, जनमत र नागरिक उन्मुक्तिले २-२ मन्त्रालयको दाबी गरेका थिए । तर, मंगलबारसम्मको सूचनाअनुसार राप्रपा र जसपा सरकारमा नजाने बुझिएकाले बाँकी दलहरूलाई बढी संख्यामा मन्त्रालय भाग पर्ने नेताहरूको भनाइ छ ।
राप्रपा सरकारमा जाने वा नजाने भन्ने टुंगो बुधबार मात्र लाग्ने जानकारी पार्टी स्राेतले जनाएकाे छ ।
त्यस्तै, जसपाले पनि केन्द्रीय कमिटिको बैठकबाट निर्णय गर्ने भनेपछि प्रधानमन्त्री प्रचण्ड कसलाई कति मन्त्रालय, प्रदेशलगायत अन्य राजकीय पदहरू दिने लिने भन्ने विषयमा निर्णयमा पुग्न सक्नुभएको छैन । जसपाको पुस १८ र १९ गते बस्ने राजनीतिक समितिको बैठकले सरकारमा जाने नजाने ठोस निर्णय गर्ने तयारी गरेको बताइएको छ । राप्रपा र जसपा सरकारमा सहभागी नहुने हो भने सत्ताको नेतृत्व गरेको माओवादीले ७ देखि ९ मन्त्रालय पाउनेछ ।
२५ जनाभन्दा बढी मन्त्री बनाउन नपाउने संवैधानिक व्यवस्थाअनुसार पाँच दललाई मन्त्रालय भाग लगाउँदा नेकपा माओवादी केन्द्रले ७ देखि ८, एमालेले ८ देखि ९, रास्वपा ४ मन्त्रालय पाउने सम्भावना रहेको नेकपा माओवादी केन्द्रका एक नेताकाे भनाइ छ।
सरकारमा जानका लागि धेरै नेताहरू तयारी अवस्थामा रहेको जिकिर गर्दै एमालेका एक केन्द्रीय सदस्यले भने– ‘तर अध्यक्षको छनोटमा को पर्नुहुन्छ र कतिजनाले स्थान पाउँछन भन्ने यकिन छैन ।’
कांग्रेससहितको गठबन्धन तोडेर एमालेसँगको नयाँ गठबन्धनबाट माओवादी केन्द्रसहित सात दल र स्वतन्त्र सांसदले प्रधानमन्त्री दाहाललाई समर्थन गरेका छन् । कतिपय स्वतन्त्र सांसदहरूलाई समेत मिलाउनुपर्ने भएकाले मन्त्री हुन चाहने नेताहरूको सूची लामो छ ।
माओवादी केन्द्रबाट वरिष्ठ उपाध्यक्ष नारायणकाजी श्रेष्ठ उपप्रधानमन्त्रीसहित भौतिक मन्त्रीको शपथ लिइसक्नुभएको छ भने अझै माओवादीबाट ७ जना मन्त्री बन्न सक्ने नेताहरूले बताए ।
