बैतडी । बैतडी–बझाङ जोड्ने जयपृथ्वी राजमार्गमा दिनहुँ पहिरो खसेर सडक अवरुद्ध हुँदा यात्रुलाई सास्ती हुने गरेको छ । राजमार्गअन्तर्गत बैतडीको श्रीभावर, ज्यापु, ढोल्यामोड, मोतीनगरसहित विभिन्न ठाउँमा पहिरो खस्ने गरेको छ ।
बझाङ जिल्ला जोड्ने र बैतडीका पनि सिगास, सुर्नया गाउँपालिका र पुर्चौडी नगरपालिका पनि यही राजमार्ग भएर जानुपर्दछ । यही असार १० गतेदेखि हालसम्म उक्त राजमार्ग पाँचपटक बन्द भइसकेको बैतडीका प्रहरी प्रवक्ता प्रहरी निरीक्षक लोकराज जोशीले बताउनुभयो । दिनमा सयौँ गाडी आवतजावत गर्ने राजमार्ग बेला–बेलामा अवरुद्ध हुने गर्नाले समस्या हुने गरेको यात्रुहरूले बताएका छन् ।
यो राजमार्गको घुम्ती कटिङ गरेर स्तरोन्नतिको काम सञ्चालन भएकाले झनै समस्या भएको छ । घुम्ती कटिङ गरेका स्थानमा पानी परेपछि पहिरो गएका छन् । प्रहरी निरीक्षक जोशीले भन्नुभयो, “घुम्ती कटिङ र स्तरोन्नतिको काम भएकाले बेला–बेला राजमार्ग अवरुद्ध हुने गरेको छ, हामीले बन्द भएको जानकारी पाउनसाथ खुलाउने प्रयास गर्छौं । जेसिबी पनि राजमार्गमै तयारी अवस्थामा राखेका छौँ ।”
बेला–बेलामा पहिराले राजमार्ग अवरुद्ध हुँदा सास्ती हुने गरेको सिगास गाउँपालिका–९ जालहाल्लाका लक्ष्मी चन्दले बताउनुभयो । उहाँले भन्नुभयो, “गत वर्षहरूमा पनि बर्सातको समयमा पहिरो बेला–बेला जाने गरेको थियो, यो वर्ष घुम्ती कटिङको काम चलिरहेकोले झनै गइरहेका छन् ।”
पहिराले घन्टौँसम्म सडक अवरुद्ध हुँदा आकस्मिकरूपमा यात्रा गरिरहेका यात्रुलाई बढी समस्या हुने गरेको छ । उहाँले भन्नुभयो, “बर्सातमा सधैँ पहिरो जाने हुँदा यात्रा गर्दा निकै डर लाग्ने गरेको छ । बिरामी र आकस्मिक यात्रा गर्नेलाई झनै समस्या हुन्छ ।”
लगातारको वर्षाका कारण राजमार्गअन्तर्गत ज्यापुमा सडक माथिबाट ठूलो ढुङ्गा खसेपछि असार १७ गते राति बन्द भएको सडक १८ गते बिहानदेखि सञ्चालन भएको थियो । यसअघि असार १७ गते पनि सोही राजमार्गको सुर्नगा गाउँपालिका–८ ढोल्यामोड र सुर्नया गाउँपालिका–६ मोतीनगरमा पहिरो खसेर अवरुद्ध भएको थियो । असार १६ गते पनि सो राजमार्गअन्तर्गत बैतडीको सुर्नया–८ आलुगैरामा, असार १४ गते पाटन नगरपालिका–८ ज्यापुमा, असार १० गते सिगास गाउँपालिका–९ श्रीभावरमा पहिरो खस्दा यातायात सेवा पूर्णरूपमा बन्द भएको थियो ।
वर्षाको समयमा यात्रा गर्न समेत डर लाग्ने गरेको बझाङ बित्थडचिर–१ का राम बोहराले बताउनुभयो । उहाँले भन्नुभयो, “साँघुरो सडक त्यसैमा बेला–बेला पहिरो खसिरहनाले घन्टौँ बीच बाटोमै बस्नुपर्छ, यात्रा गर्न निकै डर लाग्छ।” बेला–बेलामा खस्ने पहिराको दीर्घकालीन समाधानका उपाय खोज्न यात्रुको माग छ ।
सडक अवरुद्ध भएमा तुरुन्तै सञ्चालनका लागि डोजर र स्काभेटर तयारी अवस्थामा राखिएको र दीर्घकालीन समाधान घुम्ती सुधार गरी स्तरोन्नतिको काम सम्पन्न भएपछि मात्रै हुने सडक डिभिजन कार्यालय पाटनले जनाएको छ ।
