काठमाडौं । विवादास्पद छविका ल्हारक्याल लामा लुम्बिनी विकास कोषको उपाध्यक्ष नियुक्त भएका छन् ।
वैदेशिक रोजगार, हतियार, अकुत सम्पत्ति आर्जन, दोहोरो नागरिकता, राहदानी लगायतका अभियोगमा पक्राउ पर्दै छुट्दै आएका अर्थराज्यमन्त्री तथा पूर्वसांसद ल्हारक्याललाई सरकारले कोषको उपाध्यक्षमा नियुक्त गरेको हो ।
मन्त्रिपरिषद्को पछिल्लो बैठकले लामालाई कोषको उपाध्यक्षमा नियुक्त गरेको हो । माओवादी केन्द्रीय सदस्य रहेका लामाले आइतबार नै नियुक्तिपत्र बुझेका छन् ।
लामा २०६७ सालमा झलनाथ खनाल नेतृत्वको सरकारमा अर्थराज्यमन्त्री नियुक्त भएका थिए । नियुक्तिलगत्तै दोहोरो नागरिकता र राहदानीको विषय उठेपछि उनले १० दिनमै मन्त्री पदबाट राजीनामा दिएका थिए । २०६४ सालको पहिलो संविधानसभामा एमालेबाट समानुपातिक सभासद बनेका लामा २०७० मा माओवादी प्रवेश गरी दोस्रो संविधानसभामा पनि सभासद बनेका थिए । उनी २०५८ सालमा कांग्रेसबाट गुम्बा व्यवस्था तथा विकास समितिको अध्यक्ष बनेका थिए ।
ल्हारक्याल कहिले के बने ?
२०५८-२०६३ : अध्यक्ष, गुम्बा व्यवस्था तथा विकास समिति (कांग्रेसबाट)
२०६४ : सभासद् (एमालेबाट समानुपातिकमा)
२८ चैत २०६७ : राज्यमन्त्री नियुक्त (एमालेबाट)
५ कात्तिक २०७० : एकीकृत माओवादीमा प्रवेश
२५ माघ २०७१ : सभासद् (एमाओवादीबाट समानुपातिकमा)
२१ साउन २०८० : उपाध्यक्ष, लुम्बिनी विकास कोष
