कास्की । पोखरा रङ्गशालास्थित क्रिकेट मैदानमा शुक्रबारदेखि सुरु भएको प्रथम केपी ओली कप राष्ट्रिय टी–२० क्रिकेट प्रतियोगितामा बागमती प्रदेशले विजयी सुरवात गरेको छ ।
प्रतियोगिताको उद्घाटन खेलमा आयोजक मदन भण्डारी स्पोर्टस् एकेडेमी (रातो)लाई एक सय नौ रनले पराजित गरी बागमतीले विजयी सुरुआत गरेको हो । सुरुआती ब्याटिङ गरेको बागमतीले निर्धारित २० ओभरको खेलमा सात विकेटको क्षतिमा एक सय ८४ रन बनाएको थियो ।
खेलमा जीतका लागि एक सय ८५ रनको लक्ष्य पछ्याएको आयोजक रातो १४ ओभरको दोस्रो बलमा अलआउट हुँदै जम्मा ७५ रनमात्र जोड्न सफल भयो । ‘म्यान अफ दि म्याच’ घोषित बागमतीका रीत गौतमले ५३ बलमा आठ चौका र तीन छक्कासहित ७४ रनको महत्वपूर्ण पारी खेले । शुभ कंसाकारले २२ बल खेल्दै २७ रन बनाए । आयोजक रातोका बिप्रासन केसीले दुई तथा सन्देश थापा र सन्तोष यादवले समान एक–एक विकेट लिए ।
बागमतीका सन्दीप लामिछानेले चार तथा सुवास खत्रीले तीन विकेट लिए । आयोजकका अमर मिश्र र विजय प्रजापतिले समान १३–१३ रन, सन्तोष यादव १२ र निर्मल थापाले १० रन बनाए पनि अन्यले दोहोरो अङ्कको रन ल्याउन सकेनन् ।
शुक्रबार दोस्रो दिनको खेल कर्णाली र बागमती प्रदेश तथा दोस्रो खेल गण्डकी प्रदेश र सशस्त्र प्रहरीको एपिएफ क्लबका बीच हुने आयोजकले जनाएको छ । प्रतियोगितामा सात प्रदेशका सात टिम, विभागीय टोली नेपाल पुलिस क्लब, त्रिभुवन आर्मी क्लब, सशस्त्र प्रहरीको एपिएफ र आयोजक मदन भण्डारी एकेडेमीको दुई गरी १२ टोलीले उपाधिका लागि प्रतिस्पर्धा गर्नेछन् ।
एकेडेमीका संरक्षकसमेत रहनुभएका पूर्वप्रधानमन्त्री ओलीको सम्मानमा उहाँको नाममा राष्ट्रियस्तरको क्रिकेट प्रतियोगिता गरिएको एकेडेमीका अध्यक्ष धुव्र आचार्यले बताउनुभयो । प्रतियोगिताको उद्घाटन अध्यक्ष ओलीले गर्नुभएको हो । प्रतियोगिताको च्याम्पियन टोलीलाई पाँच लाख, शिल्ड, पदक, प्रमाणपत्रसहित पुरस्कार प्राप्त गर्नेछन् ।
यसैगरी उपविजेता टोलीलाई दुई लाख ५० हजार, शिल्ड, पदक, प्रमाणपत्रसहित पुरस्कार दिइने अध्यक्ष आचार्यले जानकारी दिनुभयो । अन्तर्राष्ट्रिय क्रिकेट परिषद् (आइसिसी)को नियमानुसार खेलाइने प्रतियोगितामा ‘म्यान अफ दि सिरिज’ले नगद ३० हजार, ‘बेस्ट बलर’ २० हजार र ‘म्यान अफ दि म्याच’ले नगद पाँच हजार पुरस्कार पाउनेछन् ।
