काठमाडौं । जनता समाजवादी पार्टी (जसपा) नेपालले पार्टी विभाजनको भण्डाफोर गर्न आन्तरिक परिपत्र जारी गरेको छ ।
पार्टी विभाजन गर्नु धोखापूर्ण र अनैतिक भएको भन्दै त्यसको भण्डाफोर गर्न पार्टीले आन्तरिक परिपत्र जारी गरेको हो ।
यस्तो पार्टीभित्र कहिल्यै सैद्धान्तिक, वैचारिक तथा अन्य विषयहरुमा फरक मत वा विवाद नरहेको अवस्थामा अकस्मात संसदीय दल र पार्टीको नेतृत्व तहमा आफ्नै मनोमानी ढङ्गले गुट खडा गरेकोमा जसपा नेपालले त्यसमा असन्तुष्टि जनाएको छ ।
त्यसको साथै अशोक कुमार राईको अध्यक्षतामा जनता समाजवादी पार्टी निर्वाचन आयोगमा दर्ता गर्ने कार्यको जसपा नेपालले भत्र्सना समेत गरेको छ ।
बैठकले पार्टीलाई एकताबद्ध राख्दै आगामी एकताको राष्ट्रिय महाधिवेशनलाई सफल पार्न पार्टीले जारी गरेको निर्देशिका र निर्वाचन सम्बन्धी कार्यतालिका र कार्यक्रमअनुसार निर्धारित समयमै राष्ट्रिय महाधिवेशन प्रतिनिधि चयन गरी पार्टी केन्द्रीय कार्यालयलाई जानकारी गराउने भनिएको छ ।
राईको असंवैधानिक कार्यले पहिचान, संघीयता, लोकतान्त्रिक गणतन्त्र, समावेशी जस्ता मुद्दालाई कमजोर बनाउने काम भएको ठहर गरेको छ ।
मधेसी, आदिवासी जनजाती, दलित, थारु, पिछडीएका वर्ग, मुुस्लिम, अल्पसंख्यक, उत्पीडित जाति तथा राष्ट्रियताको मुक्तिको आन्दोलनलाई नै धरापमा पार्ने कार्य भएको समेत बैठकले निष्कर्ष निकालेको छ ।