काठमाडौं । नेपाली कांग्रेसका सभापति शेरबहादुर देउवाले गिरीबन्धु टी–इस्टेटकाे जग्गा बिक्री तत्कालिन प्रधानमन्त्री केपी शर्मा ओली नेतृत्वकाे सरकारले गरेकाे बताउनुभएकाे छ ।
नेकपा एमालेका अध्यक्षसमेत रहनुभएका पूर्वप्रधानमन्त्री ओलीले नेपाली कांग्रेसले गिरीबन्धु टी–स्टेटकाे जग्गामा भ्ष्टाचार गरेर बिक्री गरेकाे भन्ने अभिव्यक्ति दिएपछि कांग्रेस सभापति देउवाले यस्ताे प्रतिक्रिया दिनुभएकाे हाे ।
बिहीबार काठमाडौंमा आयोजित प्रजातान्त्रिक विचार समाजको कार्यक्रमलाई सम्बोधन गर्दै देउवाले एमाले अध्यक्ष ओलीले जग्गा बिक्रीको निर्णय गरेर कांग्रेसलाई मुछेको बताउनुभएको हो ।
बुधबार एमाले संसदीय दलको बैठकमा बोल्दै अध्यक्ष ओलीले जग्गा बिक्री गर्ने निर्णय कांग्रेसको पालामा भएको आरोप लगाउनु भएकाे थियाे ।
ओलीलाई जवाफ दिँदै बिहीबार देउवाले भन्नुभयो, ‘ओलीजी आफूले निर्णय गर्नुहुन्छ, कांग्रेसलाई भन्नुहुन्छ । कहिले, कसको पालामा भयो, के भयो भनिदिए भइहाल्यो नी । आफूले गरेको कुरा, गरेको हो भन्न के आपत्ति छ ?’
कांग्रेस नेतृत्वकाे सरकार भएकाे समयमा यस्ताे कुनै निर्णय नभएकाे भन्दै सभापति देउवाले भन्नुभयाे, ‘अदालतले उहाँलाई भनेको छ, उहाँ के भन्नुहुन्छ भने कांग्रेसको पालामा भएको छ । कांग्रेसको पालामा गिरिजाबाबु र म हो, हाम्रो पालामा भएकै छैन ।’
पार्टीका अध्यक्ष तथा देशकाे प्रधानमन्त्रीसमेत भइसकेका ओली जस्तो नेताले नभएको आरोप लगाउन नहुने सभापति देउवाकाे भनाइ थियाे ।