काठमाडौं । उपप्रधान एवं गृहमन्त्री रवि लामिछानेको अधिकांश सम्पत्ति विवरण पत्नीको नामबाट सार्वजनिक भएको छ ।
मन्त्रिपरिषद्को हालै बसेको बैठकले प्रधानमन्त्रीसहित सबै मन्त्रीहरुको विवरण सार्वजनिक गर्ने निर्णय गरेअनुसार, प्रधानमन्त्री तथा मन्त्रिपरिषद्को कार्यालयको वेवसाइटमा सम्पत्ति विवरण सार्वजनिक भएको हो ।
विवरणअनुसार, लामिछानेको नाममा नेपाल बैंक लिमिटेडमा एक लाख पाँच हजार र ग्लोबल आईएमई बैंकमा पाँच हजार रुपैयाँ छ । उहाँको नाममा भक्तपुरमा एक रोपनी एक आना जग्गा छ ।
पैतृक सम्पत्तिबाट प्राप्त यो जग्गाबाहेक अरु सबै पत्नी निकिता पौडेलको नाममा भएको उहाँको सम्पत्ति विवरणमा उल्लेख छ।
निकिताको नाममा बुढानिलकण्ठ–८ मा ५ आना जग्गामा घर बनेको छ । विभिन्न व्यवसाय सञ्चालनबाट आएको रकमबाट तीन करोड ७५ लाख रुपैयाँमा घर खरिद गरेको भनिएको छ ।
घर किन्दा बैंकबाट लिएको दुई करोड ५० लाख रुपैयाँमध्ये अब एक करोड ५० करोड तिर्न बाँकी रहेको सम्पत्ति विवरणमा उल्लेख गरिएको छ ।
लामिछानेले पत्नी निकिता पौडेलसँग ८० तोला सुन रहेको पनि खुलाउनु भएको छ । त्यसको स्रोत भने अधिकांश बुबाआमाले दिएको र केही खरिद गरेको उल्लेख गरिएको छ ।
त्यस्तै, १५/२० केजी चाँदी रहेको भनिएको छ । त्यो दुई सय पचाँस देखि तीन सय प्रति तोला भएको बेला खरिद गरेको भनिएको छ ।
अन्य नगद निकिता पौडेलको नाममा छ । पत्नी निकितासँग गोपीकृष्ण सेन्ट्रल कम्प्लेक्सको १० रोपनी ८ आना जग्गाको २५ प्रतिशत शेयर रहेको पनि गृहमन्त्री लामिछानेले उल्लेख गर्नुभएको छ ।
निकिताको नाममा टाटा नेक्सनको विद्युतीय कार रहेको भनिएको छ । ४२ लाख रुपैयाँमा दुवैको निजी आय र बचतबाट २०७९ सालमा कार खरिद गरेको भनिएको छ ।
निकिता नारी टेलिभिजन र गोपीकृष्ण कामाक्ष मिडिया कम्पनीको सञ्चालक रहेको उल्लेख गरिएको छ ।
नारी टेलिभिजनको हालको मूल्य तीन करोड रुपैयाँ र कामाक्ष मिडियाको हालको मूल्य एक करोड रुपैयाँ रहेको सम्पत्ति विवरणमा उल्लेख छ ।