काठमाडौं । ‘तेस्रो अन्तर्राष्ट्रिय साहित्य सम्मेलन’ कोलकत्तामा हुने भएको छ । भारत–नेपाल जनमैत्री सांस्कृतिक मञ्चले मङ्सिर २२ र २३ गते सम्मेलन गर्न लागेकाे हो।
भारत, भुटान , म्यान्मार र नेपालका साहित्यकार सहभागी हुने सम्मेलनमा नयाँ दिल्लीस्थित नेपाली राजदूतावास, कोलकातास्थित नेपाली महावाणिज्य दूतावास, बिपी कोइराला फाउण्डेशन नयाँ दिल्ली, नेपाली व्यावसायिक समिति कोलकाता, ओसनिक एक्सप्रेस एलएलपी, क्लालकोक्स सिण्डिकेट प्रालि, जुपिटर कार्गो र संयुक्त नेपाली केन्द्रीय सेवा सङ्घबाट सहयोग हुने कार्यक्रम संयोजक नारायणप्रसाद हुमागाईले जानकारी दिनुभयो ।
सम्मेलनमा डा अमर गिरीले ‘नेपाली साहित्यको प्रवृत्ति’, डा रामजी तिमिल्सिनाले ‘डायस्पोरा नेपाली साहित्य’ र प्रा टेकबहादुर क्षेत्रीले ‘भारतमा नेपाली साहित्य’ विषयमा कार्यपत्र प्रस्तुत गर्ने कार्यक्रम छ । ‘वर्तमान विश्वमा भारतीय क्षेत्रीय भाषा हराउँदै गएको अवस्था’, ‘युवा र प्रौढ पुस्ताबीचको खाडल पुर्दै’ र ‘नयाँ पुस्तामा नयाँ विद्युतीय सामग्रीको प्रयोगबाट पर्ने असर’ शीर्षकमा छलफल हुनेछ ।
सम्मेलनमा वसन्त चौधरीद्वारा लिखित ‘वसन्त’ काव्य सङ्ग्रह बङ्गाली भाषा र टीकाराम गोपाल भित्रीकोटीद्वारा लिखित ‘लाज’ कविता सङ्ग्रहको विमोचन गरिनाका साथै तुल्सी प्रभासद्वारा सांस्कृतिक वृत्तचित्र प्रस्तुत गरिनेछ । नेपालबाट नेपाल प्रज्ञा–प्रतिष्ठानका कुलपति गङ्गाप्रसाद उप्रेती, हरिहर शर्मा, राजेन्द्र शलभ, रमण घिमिरे, राधेश्याम लेकाली, दिव्य गिरी, ऋषभ घिमिरे, धर्मराज बराल, सुभद्रा भट्टराई, गोकुल अधिकारी लगायत सहभागी हुनेछन् ।
