काठमाडौं । जनता बैंक नेपाल लिमिटेडको आन्तरिक रेमिट्यान्स सञ्जाल देश भित्रकै ठूलो रहेको छ । बैंकले यसै आर्थिक बर्षदेखि भारतलगायत अन्य देशबाट समेत इन्टरनेशनल रेमिट्यान्स सेवा सञ्चालनमा ल्याएको छ ।
यसै सिलसिलामा बराक साजन एक्स्चेन्ज लिमिटेड, बेलायतसँग सम्झौता गरी संयुक्त अधिराज्य बेलायतबाट रेमिट्यान्स सेवा संचालनमा ल्याइएको छ । बराक साजन एक्स्चेन्ज लिमिटेड ईङ्ल्याण्ड र वेल्समा एक्स्चेन्ज कम्पनीको रुपमा आबद्ध भएको बराक बैंक लिमिटेड, बंगलादेशको भगिनि संस्था हो । भारत, बंगलादेश, पाकिस्तान र श्रीलंकाको ठूलो समुदायमा एक्स्चेन्ज सेवा पु¥याउँदै आएको बराक साजन एक्स्चेन्ज लिमिटेडले यो सम्झौतासँगै पहिलो पटक नेपाली समुदायमा पनि सेवा प्रारम्भ गर्ने भएको छ ।
बराक साजन एक्स्चेन्ज लिमिटेडले निकट भविष्यमै पोल्याण्ड, इटली, पोर्चुगल र स्पेनमा पनि आफ्नो सेवा विस्तार गर्दैछ । सेवा पश्चात ती मुलुकमा रहेका नेपालीहरुले समेत जनता रेमिटमार्फत नेपालमा पैसा पठाउन सक्नेछन् । रेमिट सेवाबाट पठाइएको रकम देशभरी रहेका जनता बैंकको १२९ शाखाबाट भुक्तानी लिन अथवा जनता बैंकमा रहेको आफ्नो खातामा जम्मा गर्न सकिनेछ । यस अतिरिक्त करिव १७ हजारको संख्यामा छरिएका सम्सारा रेमिट, आईपे रेमिट, बूम रेमिट, जिएमई रेमिट र सेवा रेमिटबाट समेत भुक्तानी लिन सकिनेछ ।
जनता बैंकले देश भरीमा १२९ शाखा सञ्जाल, ५० शाखारहित बैंकिङ्ग, २ सिमित बैंकिङ्ग ईकाइ, २ एक्सटेन्सन काउन्टर र ८२ एटिएमबाट सरल र सहज र सरल रुपमा बैकिङ्ग सेवा प्रदान गरिरहेको छ ।
